Gimando ni Department of Public Works and Highways Secretary Vince Dizon ang pagpahunong sa bidding sa tanang proyekto nga gipundohan sa lokal sa DPWH sulod sa 2 ka semana aron magbutang og mga panalipod ug masusi kini nga mga proseso.
Nasayran nga ang mga proyekto nga gipundohan sa langyaw nga natanyagan nga bantayan pag-ayo ug susihon.
Gipasiugda sa kalihim ang panginahanglan sa paglimpyo sa mga han-ay ug pagsiguro nga ang pondo sa publiko dili na mausik.
Dugang pa ni Dizon nga iya usab nga gimando ang pagpatuman sa mas estrikto nga mga panalipod sa mga proseso niini.
Sa pikas bahin, giinsister usab ni Dizon nga kinahanglang bungkagon na ang Anti-Graft and Corrupt Practices Committee nga gitukod ni kanhi Secretary Manuel Bonoan aron imbestigahan ang giingong kurapsyon sa mga flood control projects sa ahensya.
Matod niini, dili angayan nga ang ahensya ang magpahigayon og imbestigasyon sa kaugalingong mga opisyal ug proyekto.
Gipasabot sa kalihim nga ang bag-ong pamunoan sa DPWH mohimo og kaugalingong pagrepaso sa mga proyekto ug ipasa ang tanang impormasyon ngadto sa independenteng komisyon nga gitukod ni Presidente Ferdinand Marcos Jr. aron imbestigahan ang mga iregularidad.
Sa wala pamo-resign si Bonoan, iyang gilusad ang maong komite diin ubos sa Department Order No. 166, series of 2025, aron tan-awon ang mga anomaliya sa mga flood control projects sa nagkalain-laing dapit sa nasud.
Hinuon, niinsistir si Dizon nga kinahanglang tahoron ang desisyon sa Presidente nga magtukod og independent commission ug kinahanglang isumiter niini ang tanang resulta sa imbestigasyon.
Samtang, dihang gipangutana si kanhi Kalihim Bonoan sa iyang reaksiyon sa lakang ni Dizon, iya kining gihangop ilabi na kon kini makapauswag sa departamento.
Iyang giklaro nga ang bugtong rason nga iyang gimugna ang Anti-Graft and Corrupt Practices Committee mao nga mahimong plataporma sa publiko sa pagtaho sa mga anomaliya nga makita sa mga kawani sa departamento.
Gipasalig usab ni Dizon nga iyang tutokan ang “internal cleaning” o pagpanglimpiyo sulod sa ahensya aron mapahapsay ang operasyon ug matinud-anon nga pagsumite sa impormasyon ngadto sa tukmang imbestigador nga lawas.
Plano usab sa kalihim nga personal nga susihon ang mga flood control projects sa umaabot nga mga adlaw aron makakuha og mas klarong datos kalabot sa ilang status.
