CEBU – Gipangita karun sa kapulisan sa lungsod sa Minglanilla ang usa ka drayber sa motorsiklo kinsang nakabangga sa gisakyan sa magtutudlo nga namatay sa aksidente kagahapong adlawa, Oktubre 4, sa Barangay Tunghaan, lungsod sa Minglanilla.
Giila ang mga biktima nga si Charisma Servedo, magtutudlo sa Minglanilla Central School, ingon man ang iyahang bana nga si Sherwin Servedo kinsang anaa pa karun padayon nga nagpaalim sa tambalanan.
Basi sa kapulisan, paingon na nga mag-U turn ang magti-ayon sa highway sa dihang nabanggaan sila sa nagpaingon nga usa usab ka motorsiklo.
Gumikan sa impact, nalagpot ang mga biktima hinungdan sa kamatayon sa magtutudlo.
Samtang, dali usab nga naka-ikyas ang drayber sa motor nga nakabangga sa mga biktima.
Padayon karun nga nagtigom ug mga impormasyon ang kapulisan sa panghinaut nga madakpan ang wala pa mailhi nga drayber.
