CEBU CITY-Nasikop ang usa ka habal-habal driver human nga nakuhaan og duha ka armas ug mga bala sulod mismo sa iyahang panimalay sa Sitio Lupa, Barangay Busay, dakbayan sa Sugbo.
Giila ang dinakpan nga si Marwin Caballes, 38-anyos, ug lumulupyo sa naasoy nga lugar.
Gibutyag ni Police Lieutenant Colonel Randy Korret, ang pangulo sa Criminal Investigation and Detection Group Cebu City Field Unit, nga nasignit nila ang maong dinakpan subay sa ilahang pag-serve og search warrant gikan sa sala ni Judge Marlon Jay Moneva sa Regional Trial Court sa dakbayan sa Sugbo.
Matud pa, nakuha nila gikan sa panimalay ni Caballes ang usa ka 1911 A1 Caliber .45, usa ka Magazine ug pito ka bala sa 45 lakip na ang usa ka CZ 75B Calibre 9MM pistol lakip na ang magazine ug 15 ka bala sa 9MM.
Nasayran nga ang suspek kay mao usab ang gitudlo nga drayber sa riding-in-tandem kinsang nanulis sa Capitol Site pipila ka buwan na ang nakalabay diin iyahang mga kauban ang nasikop na usab sa kapulisan.
