Gihimug-atan ni Presidente Rodrigo Duterte nga nagkasamot ang problema sa ginadiling drugas sa Sugbo gumikan sa giingong kalambigitan sa mga police officers.
Kini ang nahimong pamahayag sa presidente atubangan sa libuan ka mga Sugbuanon atol sa pagsaksi niini sa Sinulog 2020.
Partikular nga gitirahan sa presidente sa nasud mao ang dakbayan sa Talisay gumikan kay walay pahuway ang ilegal nga drug transaction ug, matud pa, nalambigit niini ang mga deputy directors.
Gitumbok usab ni Duterte nga ginadiling drugas usab maoy hinungdan sa nahitabong pagpamanhig-patay sa mga dagkong opisyal sa Sugbo.
Mihangyo usab ang presidente sa mga dagkong opisyal, ingon man mga Sugbuanon nga likayan ang paggamit sa ginadiling drugas gumikan kay dili kini makadawat alang kaniya.
Subling mipahimangno si Duterte nga iyang pamatyon ang mga tawo nga nagpaguba sa nasud tungod sa drugas.
