Gipahigayon karong adlawa ang dry run para sa pagahimoon nga fluvial procession para sa umaabot nga 461st nga kapistahan Snr. Sto. Niño De Cebu, ang Balaang Bata.
Diin usa sa mga partisipante nga barko niini mao ang M/V Lite Ferry Ten nga maoy magsilbe nga galleon karong tuiga nga pagasakyan sa imahen ni Snr. Sto. Niño De Cebu karong umaabot nga Sabado, Enero 17.
Ang dry run pagahimoon para sa pagsuta sa mga posibleng ruta sa mao nga prosesyon og sa mga kinihanglan buhaton para sa umaabot nga kalihokan.
Gani, nagbansay-bansay na usab ang pagload sa mga imahe sa maong naasoy nga galleon, ingun man anaa usab ang mga sakyanan sa Basilica Cebu nga maoy magsilbing karo nga pagasakyan sa mga imahe sa Balaang Bata, patron sa Mandaue nga si Saint Joseph, ug Birhen sa Regla.
Sa maong prosesyon, magagikan kini sa parokya sa Birhen sa Regla, mag abot ang tulo sa imahe sa Balaang Bata, Saint Joseph, ug Birhen sa Regla Naval Forces Central (NAVFORCEN), ingun man sa susamang dapit usab maghuwat ang gelleon nga sakyan sa imahe ni Snr. Sto. Niño.
Human niana, ipasakay na dayun kini sa M/V Lite Ferry 10 aron hingpit na nga sugdan ang fluvial procession.
Samtang ang Indiana Aero Space University mao usab ang posibleng gitahasan sa pagpahigayon sa tradisyonal nga paghagbong og mga buwak atol sa prosesyon.
Kabahin usab sa rota sa maong prosesyon, susama gihapon sa milabayng tuig nga manukad kini sa NAVFORCEN sa Lapu-Lapu, moagi kini padulong sa Old Brigde sa Mactan Mandaue o ang Sergio Osmeña Jr. Bridge, dayun molipot kini siya ug moagi kini sa baybayon sa Mandaue, sa North Reclemation Area, sa mga Pier gikan 6, 5, 4, 3, ug hangtud na moabot kini pier 1 kung diin diha na hingpit nga ikanaog ang imahe ni Snr. Sto. Niño.
Samtang, sa ekslusibong pakighinabi sa Bombo Radyo Cebu Newsteam kang Capt. Jerome Lazada, ang Station Commander sa Coast Guard Cebu Central, iyahang gikabutyag nga dili pa ubay-ubay ang nakasalmot sa maong dry-run kay padayon nagsing-abot pa ang ubang vessels gikan sa kaulohan, hinungdan nga nanghinaot kini nga sa sunod semana, maka dry-run pag usab alang na sa Fluvial Procession nga makaapil na ang tanang vessels nga ipang deploy.
Adunay 180 ka initial number of participating motor vessels, Navy marshal units nga ideploy para mag badlong sa mga unregistered nga mga vessels gikan sa coast guard, Navy, PNP, Maritime Police
Gipanglantawan usab nga mo lungtad og 2 hours ang fluvial parade nga sugdan alas 6:oo sa buntag, mosakay gikan NAVFORCEN hangtud alas 8:00 sa buntag, ug moabot kini sa Pier 1.
Samtang, 500-600 personnel ang ipakatap sa Coastguard, ug units gikan sa Navy, AFP, PNP, ug uban pa.
