CEBU CITY-Giangkon ni DSWD-7 Assistant Regional Director Shalaine Lucero nga nanghatag kini sila ug bugas nga nalakip na sa mga food packs.
Matud ni Lucero sa dihang nahinabi sa Bombo Radyo Cebu nga nanghatag sila ug food packs, ilabi na kung mag-request ang mga Local Government Unit (LGU) kung diin gibutang kini sa usa ka box nga adunay sulod nga unom ka kilo nga bugas, nilata, noodles ug kape.
Apan giklaro niini nga wala sila manghatag ug 25 kilos nga bugas gumikan kay giingong dili sila mamahimo nga muhatag ug tiningob.
Subay niini, gibutyag ni Lucero nga iyahang susihon ang reklamo sa usa ka ‘visually impaired’ nga si Alliane Pradilla kalabot sa giingong 25 kilos nga baho ug bokbokon nga bugas gikan sa DSWD.
Hinuon, giangkon ni Lucero nga NFA rice ang ilahang gipanghatag kung diin nagkinahanglan gayud ug maayo nga ‘storage facility’ ang naasoy nga bugas, apan ang buhatan ang giingong walay ‘airconditioned’ nga mga warehouse.
Apan gitataw niini nga ilaha gayud nga gipaningkamotan nga dili maabtan sa bokbok ang maong mga bugas ug mahatag gilayon sa mga LGUs.
‘Butangan og suka ug asin inig kilis’
Giangkon ni Florita Simbajon, ang placement officer sa Area Vocational Rehabilitation Center (AVRC) sa DSWD, nga kini ang mihatud sa bugas sa magti-ayon nga Alliane ug Jonathan Pradilla.
Matud ni Simbajon nga donasyon lang ang maong bugas ug NFA diin dili gayud maayo ang kalidad.
Apan iyahang giklaro nga wala kini masayod nga baho ug bukbukon ang maong bugas nga iyahang nahatag gumikan kay giingong igo ra man kini sa paghatag ug lain man ang mo receive ani, ingon man ang mo inspect niini.
Gidugang pa niini nga sa wala pa nila gipang-distribute ang bugas, ilaha nang gipahibalo ang mga benepisyaryo nga NFA kini ug tungod kay NFA man hayan aduna gayud kini baho diin ang pipila ang ma-tolerate, samtang ang uban ang dili gayud madala ug kaon.
Tinuod usab sigon pa nga mihatag kini ug instruction ngadto sa magti-ayon nga butangan ug asin o gamay nga suka inig kilis arun nga mawala ang baho, subay usab sa gibuhat sa mga kaubanan niini sa DSWD.
Gibutyag ni Simbajon nga igo lang usab kini nag-locate sa mga graduates sa AVRC nga hatagan nila ug ayuda. | SBR
