Nangita karon og mga boluntaryo ang Department of Social Welfare and Development sa Central Visayas (DSWD-7) aron motabang sa pag-andam ug pag-apod-apod sa mainit ug sustansiyadong pagkaon alang sa mga pamilya ug indibidwal nga nakasinati og grabeng kagutom pinaagi sa programang Walang Gutom Kitchen sa Sugbo.
Pinaagi sa usa ka opisyal nga pahibalo, gi-awhag sa ahensya ang publiko ug ang nagkadiyang organisasyon nga ipasundayag ang ilang oras ug talento alang sa maong community-based feeding program, kini matod pa nga ang maong inisyatiba nagtumong sa paghatag og regular nga pagkaon sa mga sektor nga labing nanginahanglan sa komunidad.
Sumala sa pamahayag sa DSWD-7, nanginahanglan ang Walang Gutom Kitchen sa Sugbo og mga maluluy-on ug matinabangong boluntaryo nga andam mogahin sa ilang panahon sa pag-alagad sa mga kaigsoonan nga nakasinati og involuntary hunger.
Samtang giklaro ug gihatagan og katin-awan usab ni DWSD-7 Regional Director Shalaine S. Lucero, diin matod niya, ang maong buhatan tugtan nga makahangyo og mga donasyon ug lakip niini ang mga nagkadaiyang organisasyon, ug kini subay sa Food Donation Act.
Dugang niya, i-post usab kini nila sa FB page sa DSWD ug i-advertise ang maong donations.
Ang maong kusina nahimutang sa Pier 4, Barangay Tejero, Dakbayan sa Sugbo, ug kabahin kini sa mas dako nga tinguha sa kagamhanan nga masulbad ang problema sa kagutom pinaagi sa bayanihan ug boluntaryong pag-alagad.
Base sa datus sa ahensya, malampuson nga nakaserbisyo ang Walang Gutom Kitchen og 3,317 ka libreng pagkaon sulod lang sa unang duha ka semana sa operasyon niini gikan sa Hunyo 22 hangtod Hulyo 5, 2026. Ang mga interesado nga mosalmot kinahanglan nga nag-edad og 18 anyos pataas.
Mahimo silang magparehistro isip indibidwal o grupo pinaagi sa pag-fill up sa online volunteer registration form diin aduna silay kahigayonan sa pagpili sa ilang kaugalingong iskedyul ug assignment.
Gidugang sa DSWD-7 nga dako kaayo og may-abag ang presensya sa mga boluntaryo aron mapadayon ang paghatag og pagkaon ngadto sa mga kababayen-an, kabataan, mga magulang nga lungsoranon, ug uban pang mga kabus nga pamilya nga labing apektado sa kakuwang sa pagkaon sa katilingban.
