Nakatala ang buhatan sa Department of Social Welfare and Development-Central Visayas (DSWD-7) og kapin 193, 000 ka mga pamilya o katumbas sa 780,000 ka mga indibidwal nga nagagikan sa 85 ka mga Local Government Units (LGU) ang kasamtangang gidunolan og hinabang gikan sa maong buhatan.
Ang maong numero nakabasi sa datus sa Distaster Response Operations Management Information Center (DROMIC), diin sa kasamtangan, padayon gihapon kining mga pamilyaha nga gipang apod-aporan sa mga Family Food Packs.
Subay niini, ekslusibong nakuha sa Bombo Radyo Cebu team ang habig ni DWSD 7-Regional Director Shalaine Marie Lucero, diin lakip sa iyahang naasoy nga aduna nay 182,000 ka mga family food packs ang napang apod-apod.
Gitataw usab ni Lucero nga hapit na hingpit nga makompleto ang maong buhatan sa ilahang distribution, basi sa taho sa mga nagkadaiyang LGU’s.
Apan, matod niya nga adunay mga LGU gihapon karon nga nagpadayon pa ang profiling tungod kay wala maka penetrate sa mga lugar sukad day one niadtong Nobyembre 4.
Kini tungod sa mga hagit nga giatubang sama sa mga lapokong palibot, guba nga mga dapit, ug ingun way koneksyon sa kuryente, hinungdan nga nagpadayon gihapon ang profiling sa lain-laing dapit.
Apan bisan paman nga nagpadayon ang profiling, matod ni Lucero nga ang DSWD nipasalig nga kutob sa mga datos nga ihatag sa matag LGU, nakasigurado nga mahatagan og Family Food Packs.
Gani, iyahang gikabutyag nga adunay 67 ka pamilya nga namatyan ang ilahang nadunolan usab og 10,000 cash assistance, ug ingun man pagawasan og guarantee letter aron bayaran alang na sa funeral expenses sa matag pamilya.
