Palugwayan sa Department of Social Welfare and Development (DSWD) ang ilang ‘Walang Gutom Program’ (WGP) human gitaho sa Social Weather Stations (SWS) ang dakong pagsaka sa insidente sa kagutom sa mga pamilyang Pilipino.
Kini sumala sa usa ka survey nga gihimo ning buwan sa Marso, diin 27.2% sa mga pamilyang Pilipino ang gikataho nga nakasinati sa involuntary hunger, gikan sa 21.2% sa miaging survey.
Ang tigpamaba sa DSWD nga si Assistant Secretary Irene Dumlao miingon nga padayon nila nga gipalapdan ang WGP aron matabangan ang daghang lugar sa nasud.
Sa pagkakaron, ang DSWD nanghatag og P3,000 nga binuwan nga hinabang sa 300,000 ka kabus nga pamilya sa tibuok nasod.
Tumong niini nga matabangan ang 1.5 milyones ka mga tawo ug planong mopalapad pa ngadto sa 750,000 ka pamilyang Pilipino sa tuig 2027.
Gawas niini, nagpadayon usab ang mga programa sa DSWD sama sa WGP Kusinero Cook-Off Challenge nga nagtudlo sa hustong nutrisyon ug unsaon pagpahimulos sa mga pagkaon gikan sa WGP aron mamintinar ang himsog nga pagkaon sa mga Pilipino.
