METRO MANILA-Nanawagan ang Department of Social Welfare and Development sa mga lider sa nasud nga panalipdan ang katungod sa mga kabataang Pilipino pinaagi sa pagsuporta sa mga proseso sa judicial nga gidesinyo aron manubag ang mga sad-an.
Matod sa ahensya, pipila sa mga public figure ang giingong mao’y nagpasiugda sa mga ngilngig nga buhat imbes nga mahimong modelo ug tigpanalipod sa mga biktima.
Gitataw pa niini nga dili sila mahimong magpakahilom atubangan sa mga bug-at nga kaso batok kang KOJC Pastor Apollo Quiboloy.
Ang ilang ahensya, adunay mandato sa pagsiguro sa kaluwasan sa mga indibidwal nga nahisakop sa mga huyang nga sektor sa katilingban.
Lakip sa ilang gitutokan mao ang mga alegasyon sa human trafficking, sexual exploitation, ug pag-abuso sa mga menor de edad.
Taliwala sa mga kontrobersiya nga naglibot kang Quiboloy, ang DSWD nipadayag og suporta sa giingong mga biktima niini.
Gipasalig usab sa ahensya nga hingpit ang ilang pasalig nga mahatagan og hustisya ang mga biktima ug madungog ang ilang tingog.
