CEBU CITY-Nagpadayon sa pagpahigayon og validation ang Department of Social Welfare and Services (DSWS) sa mga fire victims sa Barangay Tinago, dakbayan sa Sugbo.
Gipahibalo ni Anecita Suico, ang officer-in-charge sa DSWS, nga nakig-alayon na sila sa barangay arun nga ma-finalize ang ilahang masterlist nga mao’y basihan sa ilahang paghatag og financial assistance.
Matud pa, ang mga tag-iya sa balay ang makadawat og P20,000, samtang ang mga sharer ug renter ang makadawat og P10,000, ingon man P5,000 alang sa mga lodger.
Gawas pa niini, gidugang ni Suico nga nakig-alayon na usab sila sa Division for the Welfare of the Urban Poor (DWUP) kung makabalik pa sa ilahang mga area ang mga nasunogan arun sa ilahang paghatag og housing materials.
Samtang, gi-asoy ni Suico nga human sa tulo ka adlaw nila nga paghatag og pack meals, isunod nila dayon ang paghatag sa mga ayuda sama na lang sa disaster kits nga adunay sulod sa mga panginahanglan sa mga biktima.
Sa habig usab sa upat ka mga casualties sa maong sunog, gipahibalo usab ni Suico nga misaad si Cebu City Vice Mayor Raymond Garcia nga mao’y mo abaga sa tanang galastuhon sa nahabilin nga pamilya hangtod sa pagpa-cremate sa maong mga biktima.
