CENTRAL VISAYAS-Subling gipahimangnoan sa Department of Trade and Industry – Central Visayas (DTI-7) ang mga konsumidor nga likayan ang pagpalit o paggamit sa mga substandard nga Christmas Lights aron malikayan ang mga hulga sa kaluwasan ilabi na ang risgo sa short circuit nga mahimong hinungdan sa sunog.
Sa eksklusibong pakighinabi sa Bombo Radyo Cebu kang Ines Cajegas, ang Division Chief sa DTI-7 diin iyang giawhag nga mas angayan nga paliton ug gamiton ang Christmas Lights nga adunay Philippine Standard (PS) o Safety Mark sa mga sticker sa Import Commodity Clearance.
Dugang pa, kining mga dekalidad nga marka makita lang sa mga branded nga Christmas Lights nga mga produkto diin ang PS Quality Sticker kay alang sa mga domestic nga mga produkto ug ang ICC Quality Sticker kay gikan sa mga imported products.
Hinungdan nga giawhag sa opisyal ang publiko nga magmatngon sa pagtan-aw sa label sa mga produkto sa Christmas Lights ingon man ang hustong paggamit atol sa pagsaulog sa holiday season.
Gipaambit usab ni Cajegas nga sukad niadtong Oktubre puspusan na ang ilang monitor sa dakbayan sa sugbo ug magpadayon kini hangtod sa Enero 2025.
Sa laing bahin, ang DTI nipagawas og price guide sa mga produkto sa noche Buena ug aktibo silang nag-monitor sa Sugbo diin pipila sa mga produkto sa noche Buena ang wala mausab hinungdan nga gipahinumdoman sa ahensya ang mga Sugbuanon nga doblehon ang pag-amping sa umaabot nga kapaskuhan ilabi na niadtong mopahimulos niini.
