Giablihan sa Department of Trade and Industry (DTI) ang Philippine Innovation Hub sa Marikina aron mapalambo ang mga startup ug micro, small, and medium enterprises (MSMEs), matud sa ahensya.
Sa usa ka pahayag, ang DTI miingon nga ang “iHub” kay usa ka lima ka andana nga pasilidad nga nagtinguha sa paghatag ug halapad nga suporta sa MSMEs ug uban pang gagmay nga negosyo sa pagsugod sa ilang kalamboan.
Tumong sa ahensya nga suportahan ang 50 ka MSMEs ug hangtod sa 75 ka startup sa unang tuig niini.
Giingon usab niini nga nagtinguha nga maabot ang 500 hangtod 750 nga mga startup ug 500 nga MSMEs sulod sa 5 ka tuig.
Lakip sa mga programa nga itanyag niini naglakip sa organizational development workshop, one-stop shop, shared service facility, ug retail ug coworking spaces.
Gawas niini, ang hub magsilbi nga venue sa mga kalihokan nga gidumala sa mga kauban niini sa lainlaing sektor.
Kini nga innovation hub pagadumalahon sa DTI National Development Company (NDC) ug makatabang usab sa pagsulbad sa mga problema nga kasagarang giatubang sa gagmay nga mga negosyo sa unang mga hugna niini.
