Nipatuman ang Department of Trade and Industry (DTI) og price freeze sa basic necessities sa mga lugar nga gideklarar sa ‘state of calamity’ tungod sa bagyong Kristine.
Matod sa DTI, ang probinsya sa Albay ug Magpet Town sa Cotabato ang gilangkuban karon sa maong advisory tungod sa kaylap nga pagbaha ug pagdahili sa yuta sa dapit.
Nipasalig si DTI Secretary Cristina Roque nga padayon sila nga makigkomunikar sa Office of Civil Defense (OCD) aron ipatuman ang price freeze advisory sa mga dapit nga nanginahanglan.
Kini nga price freeze gimando sa Republic Act No. 7581 o ang Price Act, nga nag-ingon nga kinahanglan kining ipatuman kung madeklarar na ang ‘state of calamity’ sa usa ka lugar.
Ang maong price freeze magamit lang sa mga batakang panginahanglanon, sama sa delata, instant noodles, pan, kape ug uban pa, sulod sa 60 ka adlaw.
