Gipangulohan ni Department of Trade and Industry Secretary Cristina A. Roque ang pagbutyag kabahin sa economic ministers sa ASEAN diin matod niya, nagtigom kini dili lamang alang motubag sa kasamtangang hagit ug problema nga gisagubang karon sa nasud, partikular sa miyembro sa ASEAN, kondi lakip na usab sa pagtubag ug pagsiguro nga magpabiling abli ug lig-on ang pag-uswag maykalabotan sa ekonimikanhong kalihokan.
Ang maong mga buot ug tumong nahisgutan gahapong adlawa, Mayo 7, atol sa ika 27th ASEAN Economic Community Council Meeting, subay usab sa unang adlaw sa ASEAN Leaders Summit 2026.
Subay niini, dugang gipamahayag ni Sec. Roque nga nagpadayon ang tumong sa ASEAN sa pagpalambo pa sa prayoridad niini, nga Economic Deliverables sa Pilipinas, ilabi na ang ang ASEAN Digital Economy Framework Agreement o DEFA, nga gitumong aron mapalig-on pa ang digital economy.
Gipasabot usab niya nga sugdan na sa ASEAN ang paghubad sa ASEAN Community Vision 2045, ngadto sa konkreto ug praktikal nga mga aksyon nga nagtumong sa malungtarong kalamboan.
Ingun man nga gitino usab ni Sec. Roque nga dili buta ang mga programa ug ang maong mga lakang, kundili kabahin sa usa ka paningkamot aron mapabiling lig-on, kompetitibo, ug may kalabutan ang ASEAN.
Samtang ang maong panagtigom gisalmotan usab sa mga gamhanang lider sa rehiyon nga sila si Prabowo Subianto (President of the Republic of Indonesia), Samdech Moha Borvor Thipadei Hun Manet (Prime Minister of the Kingdom of Cambodia), Le Minh Hung (Prime Minister of the Socialist Republic of Vietnam), Kay Rala Xanana Gusmao (Prime Minister of the Democratic Republic of Timor-Leste), Lawrence Wong (Prime Minister of Singapore), ug si Anutin Charnvirakul (Thailand).
