CEBU CITY — Gipahibawo ni Atty. Lizer Malate, ang Mandaue City Vaccination Center Head nga nangita ang Dakbayan sa Mandaue og dugang nga nurse ug doctor alang sa paspas nga vaccination rollout.
Kini subay na usab sa plano sa pangagamhanan nga mag-abli og dugang nga vaccination sites sa Mandaue City gumikan kay sa kasamtangan aduna lay duha ka vaccination center sa maong dapit.
Gitataw ni Malate nga kung adunay daghang vaccination team, mas daghan usab ang makadawat og bakuna.
Dugang pa niini nga dili kinahanglang adunay experience ang aplikante ug ang importante lamang mao nga aduna kini kasing-kasing nga muserbisyo sa publiko ingun man nasayod sa klase sa trabaho nga sudlan.
Samtang gibutyag ni Malate nga adunay tulo ka brand sa bakuna nga gigamit ang Dakbayan sa Sugbo nga mao ang Sinovac, AstraZeneca ug Pfizer.
Nagkanayon usab kini nga sukad nga nagsugod ang vaccination rollout sa maong dakbayan, wala kini natala nga seryosong adverse event.
Gi-awhag karon ni Malate ang publiko nga dili na magduha-duha sa pagpabakuna gumikan kay daghang benepisyo nga makuha niini.// BRA, BEP
