Cebu City-Nakakuha ang mga kapulisan sa Police Regional Office 7 og dugang saksi nga magapamatuod nga giplano gayud ni Board member Niño Rey Boniel, ang pagpatay sa asawa niini nga si Bien Unido Bohol Mayor Gisela Boniel.
Naghatag usab og iyang affidavit si Niño Lito Avenido, usa sa mga security guard ng dive camp kung diin nagstay si Mayor Gisela ug Angela Leyson niadtong Hunyo 6 sa gabie. Sa panaghinabi sa Bombo Radyo ni Avenido, mga 12:30 sa tungang gabie niadtong Hunyo 7 sa dihang niabot sa dive camp si Board member Boniel Boniel sakay sa motor kauban ang ig-agaw niini nga si Lubo Boniel.
Matud pa nga wala niagi sa entrance sa resort ang duha inay niagi kini kilid sa pantalan pasulod sa nahisgutang dive camp. Dugang pa ni Avenido nga gisugo kini ni Board member Boniel nga muuli usa mahitungod kay makig-istorya kini ni Mayor Gisela Boniel. Gisugo usab kini ni Board member Boniel nga palungon ang tanang suga nga nagapalibot sa resort ingun man ang suga nga duol sa pantalan.
Bisan paman sa pagkatinga, wala na lang mangutana si Avenido ug nisunod nalang ni Board member Boniel mahitungod kay mao kini ang tag-iya sa maong resort. Walay kalibutan si Avenido sa mga panghitabo sa dive camp ug natinga na lang kini nga niabot ang mga kapulisan sa dive camp para mag-imbestigar.
Samtang , pormal ng napasakaan og kasong parricide sa sa Lapu-lapu City prosecutors office sila si Board member Niño Rey Boniel, Reyolito Boniel, Randel Lupas, Willy Hoylar , Restituto Magoncia Jr ingon man usab ang tulo ka mga atlarge nga sila si Lubo Boniel, Wilson Hoylar ug Bryan Saycon. Gi-insistir ni Police sr Supt. Jonathan Cabal sa Regional Intelligence Division nga lig-on ang ilang kaso batok sa mga suspek. Matud pa niini nga anaa pa kini recording sa nahimong pakig-istorya ni Board member Boniel kung diin gi-angkon mismo ni Board member ang ilang pagpatay ni Mayor Gisela apan gitudlo niini ang ig-agaw nga nag-operate sa bangka nga si Reyolito Boniel nga maoy nagpusil sa mayor apan gibalik usab kini ni Reyolito ang pasangil niini ni Board member Boniel.
Nasayran nga hangtod karon wala gihapon makit-i ang lawas ni Mayor Gisela Boniel nga gilabay sa dagat sa Olanggo ug Caubaian Island nga sakop sa syudad sa Lapu-lapu.
