Subling napamatud-an sa daghang mga katawhan ang bayanihan spirit pinaagi sa pagsalmot sa nagmalampusong Dugong Bombo 2019 sa Bombo Radyo Philippines.
Misanong ang atong mga blood donors sa panawagan sa mga Bombo Radyo ug Star FM stations nationwide nga boluntaryong tubagon ang panginahanglan sa dugo ning panahong nagnihit na ang supply.
Kabahin kini sa panglantaw ni Dr. Rogelio M. Florete, ang Chairman of the Board sa Bombo Radyo Philippines nga subling mabuhi ang spirit of volunteerism sa atong mga kaigsoonan aron matabangan nga masumpayan pa ang kinabuhi sa mga nanginahanglan.
Pipila sa mga lugar sa nasud ang wala nagpalupig sa kadaut sa panahon, taas nga byahe, taas nga linya, ug kahadlok sa tanang mga aftershocks sa pipila ka mga bahin sa Mindanao aron lang makahatag og donasyon sa ilang dugo.
Ang tinuig nga Dugong Bombo 2019 subling gipahigayon dungan ang 24 ka mga syudad sa tibuok nasud nga adunay Bombo Radyo ug Star FM.
Moabot sa kinatibuk-ang 9,190 ka mga indibidwal o blood donors ang boluntaryong nisalmot sa labing duguong blood letting activity sa pagpakig-alayon sa Philippine Red Cross.
Ang nahipos nga donasyon sa dugo gamiton alang sa mga biktima sa dengue, kidney failures, biktima sa managlahing katalagman, lakip na ang emergency blood transfusion ug procedures sa mga tambalanan.
Gihulagway nga mahitabo ang kanihit sa donated nga dugo sa panahon sa “ber” months.
Moabot na sa 9,190 successful blood donors ang boluntaryong mihatag sa ilang mga dugo alang sa Dugong Bombo bloodletting project. Sa maong ihap, anaa kini sa 4,135,500 cubic centimeters sa dugo.
Ang 4,135,500 cc pareha sa gidaghanon sa 4,135.50 ka litro sa dugo o moabot sa 1,092.48 gallons o 19.86 drums sa dugo nga nahipos.
Bisan pa man sa maong datos, dili pa kini final gumikan kay temporaryong gi-postpone sa Bombo Radyo Cauayan ang Dugong Bombo ug ipahigayon kini sa sunod semana tungod sa Bagyong Ramon kung diin gigamit isip evacuation centers ang venue.
Samtang dinhi sa Sugbo, mukabat sa 487 ka mga succesful blood donors kun 219,150 cubic centimeter (CC) , 57.89 gallon, o 1.38 drum ang volume sa nakolekta nga dugo.
Among usbon, daghang salamat sa mga naglangkub sa Philippine Red Cross nationwide, DOH, mga volunteers, partners, sa daghan pang mga grupo, mga nagdumala sa mga venue, ug mga donors sa snacks.
Ang Dugong Bombo, usa sa mga daghang proyekto sa Bombo Radyo Philippines nga adunay corporate socio-cultural responsibility.
Kauban usab sa mga proyekto sama lang sa Bombo Medico, ug Bombo Music Festival, nga nagtinguha sa pagpalambo sa mga talento sa Pilipino.
Kini ang Dugong Bombo 2019… A little pain, a life to gain.
