CATMON,CEBU- Patay ang duha ka babaye human malatayan sa usa ka prime mover pasado alas 6:00 sa gabii kagahapong adlawa, Sabado, Pebrero 21, sa National Highway sa Barangay Panalipan, Lungsod sa Catmon, Probinsya sa Sugbo.
Giila ang usa sa mga namatay nga si Jerlyn Colongon, 33 anyos, residente sa Barangay Guinsay, Dakbayan sa Danao. Samtang ang iyang kaangkas wala pa mailhi hangtod ning orasa.
Nailhan usab ang drayber sa prime mover truck nga nakaligis nga si Mark Absalon, residente sa Infanta Velasquez Street, Balut, Tondo, Manila.
Base sa inisyal nga imbestigasyon nga gihimo sa Catmon Police Station, nasuta nga kining maong prime mover mi overtake sa motor sa dihang adunay nagpaingon nga laing sakyanan naningkamot kining drayber sa Prime Mover nga ma apsan ang motor nga gimaneho ni Colongon.
Apan na abtan gyud sa Prime Mover ang motor og wala gayud mabantayi niini hangtod nga nalatayan ang duha ka mga sakay niini nga miresulta sa ilang kamatayon.
Sa pagkakaron, anaa na sa kustodiya sa Catmon Municipal Police Station si Absalon alang sa dugang imbestigasyon ug posibleng pagpasaka og kaso.
Padayon ang imbestigasyon sa kapulisan aron masuta ang tanang kahimtang nga mitultol sa maong trahedya.
