Gisang-at sa Office of Public Counsel for Victims (OPCV) sa International Criminal Court (ICC) ang rekomendasyon sa duha ka eksperto sa neuropsychology aron magporma og bag-ong panel aron susihon ang kahimsog sa pangisip ni kanhi Presidente Rodrigo Duterte aron masuta kon angayan ba kini nga moatubang sa pagdungog.
Sa nalatid sa dokumento nga gisumiter niadtong, si Paolina Massidda, Principal Counsel sa OPCV, miingon nga ang duha nga girekomendar sa pagsusi kang Duterte kay adunay igo nga mga credentials ug kasinatian.
Sumala sa OPCV, gipili nila ang mga eksperto basi sa ilang mga kwalipikasyon ug abilidad, lakip ang kahanas sa Ingles ug ang pinulongan diin gisulat ang pipila sa mga nangaging medikal nga nahibal-an ni Duterte.
Kahinumduman nga ang ICC kaniadto nagtudlo og tulo ka miyembro nga panel nga gilangkuban sa usa ka forensic psychiatrist, usa ka neuropsychologist, ug usa ka eksperto sa geriatric ug behavioral neurology. Apan, gihangyo sa kampo ni Duterte ang pagtangtang sa usa sa mga eksperto, tungod sa iyang kakulang sa kasinatian ug posible nga kakuwang sa pagpihig.
Ug misang-at si Atty. Nicholas Kaufman, ang lead counsel ni Duterte og motion diin nangatarungan nga ang Pre-Trial Chamber kinahanglan nga bawion ang mandato sa eksperto ug dili tugotan nga iapil siya sa listahan sa mga eksperto sa ICC.
Tungod niini, ang Pre-Trial Chamber I nagmando sa Registry nga magsumiter og bag-ong shortlist sa mga eksperto sa neuropsychology.
