CONSOLACION, CEBU-Patay ang duha ka mga batan-on, apil ang usa ka 16-anyos nga menor de edad nga babaye samtang naangol ang upat nila ka mga kauban dihang nawad-an og brake ang gisakyang motorsiklo ug nalagpot sa punoan sa kahoy sa ubos nga bahin sa Barangay Garing, Lungsod sa Consolacion pasado alas 7 sa gabii Biyernes, Disyembre 15, 2023.
Sa pakighinabi sa Bombo Radyo Cebu News team kang Police Master Sergeant Roel Aquino, ang Police Investigator sa Consolacion Police Station, gitino niini nga basi sa ilahang imbistigasyon, gituohan nga ang unom ka mga batan-on ang sakay sa usa ka motor gumikan nag-inusara ang motor nga nakit-an sa area diin nahitabo ang disgrasya.
Dugang pa niini, nga kapin sa alas 8:00 sa gabie nga narespondihan sa kapulisan ang maong insidente gumikan dugay kini nga nareport sa ilahang buhatan.
Sa pag-abot sa maong lugar nasayran nga gidala na sa duol nga tambalanan ang mga biktima sa Eversley Child Sanitarium Hospital.
Subay niini, pag-abot sa mga kapulisan sa tambalanan, gideklarar ang duha ka batan-on nga dead on arrival nga giilang si Almaveth Oljol Marquez, lalaki,18-anyos taga Brgy. Pulpogan, Consolacion Cebu ug si Jasmine Alarde babayi 16-anyos lumulopyo usab sa nasoy nga lugar.
Samtang ang mga naangol, giila nga sila si Archilles, James Nival 16-anyos, Princess Janel Mendoza, 16-anyos, Loel John Diopeta 16-anyos, ug si Lovely Mae Comiso 18-anyos.
