CEBU CITY-Patay ang duha ka managsuong babaye dihang nawad-an og brake ang gisakyang motorsiklo sa ilang amahan ug nalagpot sa sidewalk.
Nahitabo ang maong aksidente sa mangitngit nga kadalanan sa Barangay Sinsin ning dakbayan sa Sugbo pasado alas 10 sa gabii niadtong adlaw sa Miyerkules Hulyo 3, 2024.
Matod pa sa kabanay sa mga biktima nga ang mga bata nag-edad og 9 ug 12, ug ilang mga ginikanan nga giilang sila si Germain ug Cherrefe Pardillo.
Subay sa maong panghitabo nga padulong kini sila sa Barangay Mohon sa dakbayan sa Talisay aron motambong sa haya sa ilang kabanay dihang nahitabo ang aksidente.
Naangol usab sa maong insidente ang amahan ug inahan sa mga bata nga daling gidala sa Cebu South Medical Center.
Tungod sa grabeng kadaot nga naigo sa ulo sa duha ka babaye kay nakabsan dayun kini ug kinabuhi.
Sa pagkakaron, padayon pa ang imbestigasyon sa Traffic Enforcement Unit sa Cebu City Police Station.
