Gipabalik ni Cebu City Vice Mayor Michael Rama ang duha ka mga trabahante sa Department of Social Welfare and Services (DSWS) nga gi-assign sa iyang opisina.
Kini human nga nagpositibo kini sa ilegal nga drugas ang nahisgutang mga job orders atol sa nahitabong surprise drug test.
Matud ni Rama nga walay bisan usa ka mga empleyado sa Vice Mayor’s Office ang nagpositibo sa drugas apan adunay duha ka mga detal nga gikan sa nahisgutang departamento ang kasamtangang na-assign sa iyang buhatan.
Samtang nangayo usab kini og kumpleto nga listahan sa mga drug tests results sa mga nanarbaho sa vice mayor’s office ug sa uban pang mga staff sa City Council.
Apan sa gihapon, gipatigbabaw ni Rama ang due process alang sa pagpahigayon sa maong tests.
Dugang pa ni Rama nga si Mayor Edgardo Labella lang ang adunay gahum nga motaktak sa duha ka mga job orders gumikan kay under man sa Executive Office ang DSWS.
