CEBU-Gikustodiya na karon sa National Bureau of Investigation Cebu District Office sa dakbayan sa Mandaue ang duha ka mga tawo nga giingong “bugaw” human nangbiktima sa tulo ka menor de edad.
Ang mga dinakpan mao sila si alyas “Dave”, 29-anyos, kasamtangang nagpuyo sa lungsod sa Liloan, ug alyas “Chelsea”, 19-anyos, usa ka tinun-an ug lumad nga taga dakbayan sa Danao.
Basi sa imbestigasyon sa NBI, nga makadawat og 1,500 pesos ang mga suspek sa matag babaye nga ilang gipaila-ila sa ilang mga kustomer, ug 500 pesos usab ang madawat sa mga suspek kung maaprobahan sa ilang mga kustomer ang mga babaye nga ilang gipaila-ila.
Kung magkasabot na ang kustomer ug ang suspek nga si dave, ara na moduol si Chelsea dala sa girequest nga babayeng menor de edad diin ila kini baligyaan sa sexual service.
Gipahigayon niadtong Pebrero 28 ang operasyon sa NBI CEBDO nga gipangulohan sa senior arresting office nga si Atty. Niño Rodriguez diin malampuson nga nasikop ang mga suspetsado human gikatahong nakabiktima og 16 anyos ug usa ka 14 anyos.
Apan depensa sa mga suspek nga wala sila masayod nga adunay mga menor de edad ang ilang mga ibugaw nga mga babaye.
Ingon man nga gawas nga nasayod sila nga sayop ang ilang gibuhat apan wala na silay nahimo inay nangayo kini og pasaylo sa pamilya sa ilang mga nabiktima.
Nag-atubang og kaso sa qualified trafficking in persons ang maong mga suspek samtang ang menor de edad nga mga biktima, anaa na sa buhatan sa DSWD. – Bombo Rexmond Omega
