CEBU CITY — Sirad-an na ang duha ka mga taytayan nga nagsumpay sa isla sa Mactan ug dakbayan sa Mandaue sugod karong adlawa.
Matud ni Lapu-Lapu City Mayor Junard Ahong Chan nga wala nay mga indibidwal nga makasulod ug makaagi sa Mactan-Mandaue Bridge ug Marcelo Fernan Bridge nunot na sa nagkasaka nga kaso sa COVID-19 sa Sugbo.
Apan exempted sa maong lakang ang mga indibidwal nga nagdala og mga essential goods, frontliners, ug mga adunay emerhensiya.
Dugang pa ni Chan nga gidili usab ang pag-agi sa Olango Island ug mitambag sa mga taga-Olango nga nagtrabaho sa mainland sa Lapu-Lapu nga magpuyo una sa mainland.
Subay niini, mipahinumdom si Chan nga ipatuman sugod karong adlawa ang number coding scheme sa mga sakyanan aron malikayan ang trapiko samtang gipaubos sa enhanced community quarantine.
Makaagi sa mga dalan ang mga sakyanan nga adunay odd number sa last digit sa plaka matag Lunes, Miyerkules, ug Biyernes.
Samtang gitugutang makabyahe matag Martes, Huwebes, ug Sabado ang mga sakyanan nga adunay even number sa plaka.
Gitataw ni Mayor nga kinahanglang ipatuman ang maong kamanduan aron striktong mapatuman ang physical distancing isip paglikay sa COVID-19.
Ipatuman usab sugod karong adlawa ang shopping coding scheme isip kabahin sa striktong pagpatuman sa social distancing ubos sa enhanced community quarantine.
Gitugutang makapalit sa mga groceries ug palengke ang mga adunay quarantine nga nagtapos ang last digit niini sa bungkig o odd numbers (1, 3, 5, 7, ug 9) matag Lunes, Miyerkules, ug Biyernes.
Samtang mahimong makapalit sa mga basic goods ang mga adunay quarantine pass nga nagtapos sa pares o even numbers (2, 4, 6, 8, ug 0) sa Martes, Huwebes, ug Biyernes.
Sa adlaw nga Dominggo, makapalit ang mga konsumidor nga adunay odd numbers sa quarantine pass sa buntag, samtang even numbers usab sa hapon ug gabii.
Matud usab ni Chan nga sirad-an ang mga satellite, public, ug private markets sa Dominggo sa gabii alang sa disinfection.
