LAPU-LAPU CITY-Nadakpan sa Kapulisan sa Siyudad sa Lapulapu nga gipangulohan ni City Police Director, Coronel Elmer Lim ang duha ka mga tawo nga apil sa Most Wanted Persons sa Central Visayas.
Gibutyag ni Col. Lim nga ang mga nadakpan mao sila si Margarito Fuentes, 36 anyus, lumad nga taga Lungsod sa Ronda, Cebu apan kasamtangang nagpuyo sa Canduman, Siyudad sa Mandaue ug si Benjie Sorvila nga lumolopyo sa Barangay Gun-ob.
Kung diin si Fuentes nag-atubang sa kasong murder nga maoy Top 3 Most Wanted sa Central Visayas ug si Sorvila Top 5 nga dunay kasong pagpanglugos.
Ang duha pulos nasikop sa mga sakop sa Lapulapu Police Station 3 nga gipangulohan ni Major Jaypee Dagami sa magkalahi higayon ug lugar sa siyudad.
Gibutyag sa tigpamaba sa Lapulapu City Police Office, nga si Lt. Col. Christian Torres nga si Fuentes nadakpan human gireklamo nga nanion og Armas ug nisuway sa pagpamusil sa usa ka panday ug nagwarawara sa iyang armas nga Ingram sub-machine gun pistol didto sa Barangay Mactan.
Samtang sulod sa selda sa Holding Facility sa Mactan Police Station 2, gisusi ang records sa suspek ug nahibaw-an nga dunay kini nag-ong-ong nga kasong murder diin gipusil patay niini ang usa ka tawo nga natulog sa duyan.
