Naangol ang duha ka indibidwal human nagbangga ang duha ka pampasaherong tren duol sa Bialosliwie sa kasadpang Poland.
Matud ni Pawel Rykowski, ang tigpamaba sa mga bombero, ang usa sa mga tren nagbiyahe gikan sa Kolobrzeg paingon sa Warsaw East Station, samtang ang pikas tren gikan sa Pila paingon sa Bydgoszcz.
Nahitabo ang maong aksidente mga alas 6:04 sa gabii (oras sa Poland) didto sa Bialosliwie.
Gibanabana nga moabot sa 200 ka mga pasahero ang sakay sa duha ka tren sa dihang nahitabo ang pagbangga.
Sa mga video nga mikatap sa social media, makita ang mga pasahero nga nagtindog sa riles samtang ubay-ubay ka mga bagon sa tren ang nadiskaril gumikan sa kakusog sa bangga.
Sa pagkakaron, padayon pa nga giimbestigahan sa mga awtoridad ang tinuod nga hinungdan sa maong aksidente.
