CEBU CITY-Duha ka tawo nga giingong gikidnap ug gitulis pasakaan ug kaso kung mapamatud-an nga namakak kini
Pasakaan ug kaso ang duha ka tawo nga giingong gikidnap ug gitulis sa Hulyo 10, 2023 kini human nga wala nagkatakdo ang testimonya nila, ug kung mapamatud-an nga bakak ang ilang gitaho sa police, dili sila magpanuko sa pagpasaka og mga kaso nga alarms and scandal ug perjury batok sa maong mga tawo.
Kini ang gitino ni Police Colonel Ireneo Dalogdog, ang Cebu City Police Office (CCPO) director, nga ang giingong mga biktima, mihatag og tulo ka managlahing dapit diin sila giingong gitulis ug gikidnap.
Hinungdan nga dakung pangutana karun sa sakop sa kapulisan kung tinuod bagyud nga nahitabo ang pagpanulis ug pagkidnap sa tulo ka tawo.
Gitumbok ni Dalogdog nga sa una nangangkon ang mga giingong biktima nga nahitabo ang mga krimen sa Carbon Market sa dakbayan sa Sugbo.
Apan dihang niabot sa Carbon Police Station sa dakbayan sa Sugbo ang mga biktima nga giubanan sa mga polis sa Talisay City Police Station, niingon nga duol ra sa Compania Maritima Building ang crime location.
Gumikan niini nakig-alayon si Police Major Miles Damoslog sa Carbon Police Station sa Waterfront Police Station diin nahimutang ang Maritime building aron masiguro nga magpadayon ang imbestigasyon.
Giingon sa mga biktima nga sila gitulis ug gikidnap alas 7 sa buntag niadtong adlawa, Apan sa dihang gisusi sa mga polis sa Waterfront ang footage sa mga CCTV sa maong lugar gikan alas 6 sa buntag hangtod sa udto niadtong tungora, apan wala diha ang van nga giingong gisakyan sa mga biktima sa nahitabo ang krimen bisan unsa nga footage sa mga CCTV.
Matod usab ni Dalogdog nga ila karong gisusi kun hinimo ba lang sa giingong biktima ang senaryo aron dili makabayad og utang.
