CEBU – Gihimug-atan ni Major Eduardo Precioso, ang tigpamaba sa Armed Forces of the Philippines Central Command nga dili angay nga mabalaka ang publiko kabahin sa giduso ni Sen. Panfilo Lacson nga Senate Bill 1734.
Ubos sa maong balaudnon, nakalatid niini ang 2-year mandatory military service sa mga lalaking Pilipino. Segon ni Precioso nga wala pay nadawat nga implementing guidelines ang Central Command sa AFP mahitungod niini.
Apan matod sa opisyal nga bisan pa man og wala pa kini nakadawat og kompletong detalye sa nahisgutang Senate bill, aduna nay balaod ang Pilipinas kabahin sa military service sama sa RA 9163 o ang NSTP laws nga gi-praktis sa mga nagtungha sa kolehiyo.
Nanghinaot kini nga dili magpanic ug mabalaka ang publiko gumikan kay maayo man ang tumong niini aron sa pagpalig-on sa reserve force sa nasud. Nagkanayon si Precioso nga dili bag-o ang maong balaudnon nga giduso ni Sen. Lacson gumikan kay nahitabo man usab kini sa laing nasud sama sa South Korea ug Mexico diin mandatory usab ang military service.
Dugang nga punto niini nga ang tumong lamang sa maong Senate bill aron sa pagpalapad sa hugpong sa mga militar nga dako og tabang sa panahon sa mga katalagman ug alang usab sa preparasyon sa gobyerno.
Samtang gibutyag niini nga makasabot lamang kini kung adunay mga inahan nga dili buot nga musulod ang mga anak sa militar tungod kay sayod kini nga walay inahan nga buot nga mabutang sa kahago ang mga anak.
Ang mahinungdanon matod pa nga kung musulod ka sa AFP, adunay hiyas sa pagserbisyo sa komunidad ug sa nasud. Kinahanglan usab nga adunay commitment nga dili matarog ug ang pagprotihir sa matag Pilipino aron ma-mintinar ang peace and order sa Pilipinas.
