Duha nalang ka missing ang gipaningkamutan nga makit-an sa mga sakop sa Bureau of Fire Protection responders sa Barangay Bacayan ning dakbayan sa Sugbo nga gibanlas sa bag-o lang miigo nga Bagyong Tino.
Kini ang gipaambit ni SFO 3 Wendell Villanueva, ang tigpamaba sa Cebu City Fire Station atol sa pakighinabi sa Bombo Newsteam nga padayon ang lang retrieval operation bisan paman sa hulga sa Super Typhoon Uwan nga maapektuhan gihapon ang Kabisay-an apan dili susama sa Tino.
Gisaysay usab niini ang mga hagit nga ilang nasugatan diin partikular ang lugar sa Sapangdaku tungod sa pangpang ug pagdahili sa yuta, ingon man ang wala pag-gamit sa mga heavy ug automatic equipment, hinungdan nga mano-mano ang ilang operasyon.
Dugang niini nga gumikan kay lapukon ang dapit ug kinahanglan nga siguruhon usab ang kaluwasan sa mga responders maong dili gayud magpatuyang sa lihok.
Gikanayon usab ni Villanueva nga tungod sa coordination meeting nga gipangulohan sa City Government, kauban ang uban pang responders, paspas ug wala nagtibulaag ang direksyon sa search, rescue and retrieval operation.
Ingon man nga ubay-ubay ang ilang naluwas ug daghan usab ang ilang narekober nga patayng lawas.
Sa pikas bahin, nipaabot og pasalamat ang Gobyerno sa Dakbayan sa Sugbo sa mga Barangay Fire Brigades ug Volunteer Fire Brigades sa ilang kritikal nga tabang human sa Bagyong Tino.
Ingon man giila sa mga opisyal sa siyudad ang mga paningkamot nga namatikdan nga ang ilang serbisyo nagpakita sa espiritu sa panaghiusa sa komunidad.
