LILOAN,CEBU- Naangol ang usa ka operatiba sa Barangay Intelligence Network ug na-neutralize ang usa ka giilang drug personality human sa usa ka armadong engkwentro nga nahitabo sa Sityo Tabay Barangay Tayud, lungsod sa Liloan, Hulyo 21, 2025.
Sa pakighinabi sa Bombo Newsteam, si Police Major Mawi C. Arcilla, hepe sa Liloan Municipal Police Station, mitino nga nakadawat sila og kumpirmadong impormasyon gikan sa BIN bahin sa presensya sa usa ka suspetsadong drug personality nga armasado diha sa Sitio Tabay, Barangay Tayud.
Giila ang suspek nga si Sammy Alefeche Taborada, 55 anyos, residente sa maong lugar.
Matod pa ni PMaj. Arcilla, usa ka operatiba sa intelihensiya, kauban ang usa ka asset sa BIN, mipahigayon og validation operation.
Apan, sa dihang duol na sila sa pinuy-anan sa suspek, kalit kining namusil gamit ang usa ka KG-9 9mm automatic firearm.
Tungod niini, napugos sa pagbalos og pusil ang mga operatiba sa kapulisan nga misangpot sa pagkasamad ug pagkaneutralize ni Taborada.
Gidali sa pagdala ang suspek sa Vicente Sotto Memorial Medical Center sa dakbayan sa Sugbo.
Narekober sa crime scene ang usa ka kalibre .45 nga pistola ug ang giingong gigamit nga KG-9 9mm automatic firearm.
Sa maong engkwentro, naigo usab sa wala nga bukton ang usa sa mga operatiba sa BIN nga giilang si Jemboy Bacalso, 34 anyos, bisan pa man sa pagsul-ob niini og bulletproof vest.
Dayon kining gitabangan sa mga sakop sa Municipal Disaster Risk Reduction and Management Office (MDRRMO) ug gidala ngadto sa Eversley Childs Sanitarium and General Hospital diin siya karon gibantayan ilawom sa suod nga medikal nga obserbasyon.
Sa pagkakaron, padayon ang imbestigasyon sa Liloan PNP aron matino ang tibuok kalihokan ni Taborada ug ang posibleng koneksyon niini sa dagkong personalidad sa illegal nga drug trade.
