CEBU CITY-Hingpit na nga naporma ang duha sa upat nga bus stations sa Phase 1 sa nagpadayon nga Cebu Bus Rapid Transit project sa dakbayan sa Sugbo.
Lakip niini ang station nga nahimutang sa N. Bacalso diin duol sa Cebu South Bus Terminal ug ang padayon nga gitukod sa Osmeña Blvd. duol sa tunghaan sa Cebu Normal University.
Kahinumduman nga unang gilugwayan ang target nga mahuman ang maong proyekto niadtong Disyembre 2023 hangtud ning buwan sa Hunyo 2024.
Apan, sa pagsulod sa Hunyo aduna pa’y duha ka sa station ang wala pa masugdi sa pagtukod.
Nasayran usab nga gipaabot sa mga kontraktor ang mga delivery nga gikan sa China subay sa pag-usab sa disenyo ug makasugod na kini sa Fuente.
Gipadayag usab nila ang ilang gikabalak-an ning nagsugod na ang ting-ulan diin matud pa nga maapektuhan ang ilang pagtrabaho partikular na sa pag-welding agi’g pagdepensa sa ilang mga kaugalingon na usab.
Subay niini, gipahibalo ni Cebu City Acting Mayor Raymond Garcia nga wala pa’y kasiguraduhan kung kanus-a o unsang buwan nga hingpit na gayud nga mahuman ang unang hugna sa maong CBRT project.
