PROVINCE OF CEBU- Nanawagan si Cebu Fifth District Representative Duke Frasco ngadto kang Gobernador Pamela Baricuatro nga ihiklin ug ipadaplin ang politika ug ipadala dayon ang hinabang ngadto sa mga lugar nga grabeng naapektuhan sa bag-ohay lang nga pagbaha tungod sa Bagyong Tino nga niigo sa ubay-ubayng bahin sa Sugbo.
Matod niya, dili na panahon sa pagtan-aw sa kamera o pag-atake sa social media, hinoon, karon nga panahon nga kinahanglan magkahiusa isip mga Sugbuanon ug magtinabangay.
Gitataw usab ni Frasco sa iyahang panawagan nga adunay dakong panginahanglan karon sa Liloan, Cebu. ilabi na sa mga heavy equipment, mga excavator, payloaders, bulldozers, ug backhoes, aron motabang sa mga operasyon sa pagpanglimpyo sa naasoyng dapit.
Lakip sa iyahang nahisgutan nga niadtong Nobyembre 5, ang DPWH, LGU, ug ang private sector nagpadayon na sa pagdeploy sa ilang mga gamit, ug padayon ang pagpanglimpyo. Apan hangtod karon, iyang giingon nga ang Probinsiya sa Sugbo wala pa makapadala bisan usa ka piraso sa heavy equipment o bisan unsang tabang ngadto na sa Liloan.
Busa, nanawagan siya sa Gobernadora nga tabangan ang Liloan, taliwala sa ilahang political differences kay alang kaniya, ang Liloan, parte gihapon sa Sugbo, kay ang mga Liloanon mga Sugbuanon usab.
Dugang niya nga dili angay mang daog-daog ang Gobernadora kay ang katawhan ra gihapon ang mag-antos.
