Mokabat sa dul-an 64,000 ka mga tawo ang giila nga apektado o katumbas sa 23,022 ka mga pamilya nga gikan sa 90 ka mga barangay sa Bicol Region, Eastern Visayas, ug Caraga Region tungod sa kadaot nga gipahinabo sa Bagyong Ada.
Basi sa taho nga moabot sa 2,816 ka mga tawo ang gipabakwit kini katumbas sa 997 ka mga pamilya nga anaa karon sa 22 ka mga evacuation center.
Sumala sa Department of Social Welfare and Development (DSWD) – Disaster Response Management Office, ang mga lokal nga gobyerno nagpadayon sa pagpabakwit sa pipila ka mga residente nga karon naapektuhan sa sunod-sunod nga mga baha tungod sa walay hunong nga pag-ulan, busa ang datos gilauman nga mausab.
Nagpadala usab ang gobyerno og gatusan ka mga family food packs sa mga evacuation center diin nahimutang ang mga biktima sa bag-ong bagyo.
Sa pagkakaron, ang Pilipinas adunay hapit P3.4 bilyon nga kantidad sa mga hinabang alang sa mga biktima sa kalamidad nga gilangkoban sa kapin P75 milyon nga quick response funds ug P3.3 bilyon nga kantidad sa food at non-food items.
