CEBU CITY — Gipang-ibot ug gisunog sa mga sakop sa Regional Mobile Force Battalion (RMFB)-7 ang dul-an P3-million nga kantidad sa marijuana plants sa Sitio Gen. Climaco, dakbayan sa Toledo, Cebu.
Atol sa ilang operasyon kagahapon, nasikop ang lima ka tig-atiman sa plantasyon nga silang Jerlito Sedavia, Michael Candilada, Benjie Candilada, Isidro Canaliso, ug Harry Macapaz.
Matud sa team leader nga si Police Captain Emmanuel Rabaya gikan sa RMFB-7, nga gipaubos sa duha ka semanang surveillance ang maong halapad nga plantasyon hinungdan nga nahitabo ang maong operasyon.
Dugang pa ni Rabaya nga nagtuo ang mga dinakpan nga posibleng matambalan ang usa ka COVID-19 patient gamit ang marijuana.
Nakuha sa mga sakop sa pulisya ang 7,000 ka stalks sa fully-grown marijuana plants nga mibalor ngadto sa P2.8-million.
Kasong kalapasan sa RA 9165 ang atubangon sa mga dinakpan samtang gikustodiya kini karon sa kapulisan. (gn)
