CEBU CITY — Mikabat sa P47.6 million nga kantidad sa shabu ang nasakmit sa PNP ug PDEA 7, sa ilahang malampuson nga buybust operation kaganihang buntag sa Tipolo Ville, Barangay Guadalupe, dakbayan sa Sugbo.
Giila ang mga dinakpan nga sila si Rolando Romeo, 32 anyos; Calvin Valdez, 42 anyos; ug Eduard Romeo, 24 anyos, ug pulos kini mga residente sa naasoy nga dapit.
Gipanid-an ang mga dinakpan ug duha ka buwan hangtud nga gipahigayon ang maong operasyon.
Giingong nagagikan ang mga binulto nga shabu sa San Carlos City, Negros Oriental, ug gi-pick up sa usa sa mga dinakpan nga si Romeo sa pantalan sa dakbayan sa Toledo, probinsiya sa Sugbo.
Gituohan nga ang pito ka kilo nga shabu ang nagagikan sa usa ka New Bilibid Prison detainee nga si Rustico Repuela.
Basi sa inisyal nga imbestigasyon sa mga otoridad, giangkon usab ni Romeo nga naka-dispose na kini ug shabu niadtong panahon pa sa quarantine lockdown dinhi sa dakbayan sa Sugbo.
Narekober sa mga otoridad sa gipahigayon nga operasyon ang pito ka kilo nga shabu nga gisulod pa ug Chinese tea bag.
Mag-atubang ang tulo ka mga dinakpan ug kasong kalapasan sa RA 9165 o Comprehensive Dangerous Drugs Act of 2002. /report by Bombo Jun Salde/GN/SBR
