CEBU CITY-Nagtingkagol na sa Balamban detention cell ang 3 ka mga dinakpan human naatlan nga namutol sa mga punu-an sa marijuana sa Sitio Capio-an Brgy. Sunog– bukirang bahin sa lungsod sa Balamban probinsya sa Sugbo.
Ang mga dinakpan mao ang kanhi konsehal sa Brgy. nga si Leopoldo Bonghanoy, 64 anyos, anak niini nga si Fernan Bonghanoy ug pag-umangkon niini nga si Arnel Castro, 37-anyos nga mga residente sa nahisgutang lugar.
Gipahigayon ang maong operasyon sa Cebu Provincial Mobile Force Company, Balamban Police Station, ug Philippine Drug Enforcement Agency (PDEA 7).
Gibutyag ni Police Major Christian Torres, ang hepe sa Balamban Police Station (PS) nga gihap-an na kini daan sa ilang operatiba gabii palang gumikan kay kaadlawon ang sagad nga tigpamutol sa mga punu-an hinungdan nga nasikop gayud ang tulo.
Nakuha sa mga operatiba ang kapin sa 22 mil ka punu-an sa marijuana nga gibana-bana nga nagkantidad og P8.8-M.
Sigon ni Torres nga mihimakak pa ang mga dinakpan nga sila ang nananum niini apan adunay ebidensiya ang kapulisan nga ang kanhi konsehal ug iyahang anak ug ingon man pag-umangkon ang mga cultivators sa marijuana gumikan kay adunay hose nga maoy gigamit niini sa pagbisbis sa mga tanom nga marijuana gikan sa balay ni Bonghanoy.
Nasayran nga kini na ang ika-8 nga dakop nila sa Marijuana gikan sa iyang paglingkod.
Samtang gisunog ra usab dayon sa mga operatiba ang nalarot nga mga punu-an sa marijuana ug ang uban niini gidala na sa PDEA alang sa ebidensya.
Kasong kalapasan sa ginadili nga drogas ang ipasaka batok sa tulo ka mga dinakpan. (Lahvi Quiñones)
