CEBU CITY-Na-imbargo sa kapulisan sa probinsya sa Sugbo ang dul-an sa 300 ka mga armas nga walay lisensya sukad sa pagsulod sa election period niadtong Agusto 28, hangtod Octobre 9, 2023.
Kini subay sa ilang pag hingusog sa kampanya batok loose firearms ning nagkaduol na ang Barangay ug Sanguniang Kabataan Election sa Oktubre 30, 2023.
Sa data nga gipahibawo ni Police Colonel Percival Zorilla hepe sa Cebu Police Provincial Office adunay 63 ka search warrant ang ilang gi-applyan nga miresulta sa pagkasikop sa 43 ka tawo ug pagka sakmit sa 264 ka armas.
Moabot usab sa 28 ka armas ang ilang nakuha sa ilang mga police operations samtang ang uban nasakmit sa gilusad nga Comelec Checkpoints.
Dugang pa, nga nagka lain-laing matang sa armas ang nakuha sama sa .45, .38 ug 9mm nga walay gipakita nga lisensya nga nagpasabot nga mga home made ang kasagaran nga nakuha.
Ang maong mga armas ang gipaubos sa forensic exam kung wala ba kini magamit sa krimen sa tibuok Central Visayas.
