Dili na hingpit tugutan nga makatukod pagbalik ang dul-an sa 50 ka mga panimalay nga natukod ibabaw sa giingung “Bogo Bay Fault” diin maoy gitudlo nga hinungdan sa Magnitude 6.9 nga linog nga miigo sa amihanang Sugbo niadtong Septyembre 30.
Kini ang gikabutyag sa Office of Civil Defense Region 7 ug base sa rekomendasyon sa Phivolcs atol sa ilang pagsuta sa nahisgutang fault line human sa makamatay nga linog
Matud pa ni Office of the Civil Defense-7 Regional Director Joel Erestain, ang mao nga buhatan moabag sa local nga pangagamhanan sa pagpatuman sa five meter no build zone duol sa fault line aron di na kini hingpit makamugna og kadaut sa mga pagatukoron nga mga panimalay human sa mao nga linog
Padayon pa usab nga nagplano ang buhatan sa OCD ug ang mga Local Government Units para sa pagtino sa mamahimong relocation site nga maoy balhinan sa mga apektadong residente.
Dugang usab ni Erestain, nga i-relocate usab ang mga pamilya diin ang ilang panimalay gitugkan ug sinkhole ug sigon usab niini nga possible pa usab kining mapun-an pa base sa rekomendasyon sa mga awtoridad.
Sigon usab sa opisyal nga mamahimo ra nga makatukod ang mga residente sa ilang mga panimalay kung wala na gayuy motumaw nga mga pagtay-og sa yuta, nga base sa rekomendasyon nga hangtud sa buwan sa Disyembre pa kini posibleng mawala.
Mapasalamaton usab si Erestain, gumikan sa ka dako ug tampo sa tent city nga maoy nagsilbing temporaryong pinuy-anan sa mga naapektohan nga mga lugar sa amihanang sugbo tungod possible nga molanat pa ug pipila ka buwan ang mga aftershocks.
