CENTRAL VISAYAS- Nagpabiling gi-postpone ang pipila ka mga ‘sea trips’ paingon ug gikan sa Sugbo gikan gahapon Septiyembre 15, 2024, hangtod karong adlawa tungod sa padayong dili maayong kahimtang sa panahon dala sa Tropical Storm Ferdie (international name Bebinca).
Sa pakihinabi sa Bombo-Newsteam kang Ensign Abel Lomboy, tigpamaba sa Coast Guard District Central Visayas, gitino niini nga ang tanang operasyon mabalik sa higayon nga maisip na nga luwas alang sa mga barko nga molawig sa kadagatan.
Lakip sa nakanselar nga mga biyahe sa dagat sugod niadtong Domingo mao ang paingon sa Getafe ug Tagbilaran sa Bohol, Ormoc, ug San Carlos sa Negros Occidental.
Kung diin, adunay di mominos sa 500 ka mga sakayang pandagat ang wala gipa-biyahe sa tibook Central Visayas ilabi na sa mga anaa sa 250 “gross tonnage” paubos.
Sa naasoy nga ihap, adunay 41 ka mga Vessels, 469 ka mga Motorbanca ug Pito ka mga Rolling Cargoes.
Ang adunay NOTAM temporary suspension voyage sa mga sakyanang pandagat nga anaa sa 250 “gross tonnage” paubos sa CGS Negros Oriental, CGS Western Bohol, CGS Camotes Island, CGS Siquijor, ug CGS Eastern Bohol.
Gipahinumdoman sa mga opisyal sa Coast Guard ang mga boat operators, mga turista ug ang publiko nga bantayan ang ilang mga advisory nga magpabiling mabinantayon sa kahimtang sa panahon, ilabi na sa mga panahon nga adunay kalit nga mga bagyo.
