CENTRAL VISAYAS- Gi-deploy sa Police Regional Office 7 ang dul-an sa 500 ka security personnel aron masiguro ang kaluwasan ug kahusay sa 2026 Central Visayas Regional Athletic Association o CVIRAA Meet nga gipahigayon sa City of Naga, Sugbo gikan Marso 22 hangtod Marso 28, 2026.
Gipahigayon ang send-off ceremony niadtong Marso 21 isip kabahin sa andam nga seguridad sa regional sports meet, diin gibantayan sa kapulisan ang mga sports venue ug billeting area sa mga atleta, coach, ug delegado sa tibuok semana nga kalihokan.
Gitukod usab sa PRO7 ang Police Assistance Desk o PAD sa mga estratehikong lugar aron dali matabangan ang publiko ug mapalig-on ang peace and order sa maong kalihokan.
Gawas sa kapulisan, mitabang usab sa seguridad ang Armed Forces of the Philippines, Philippine Army, Philippine Coast Guard, ug Disaster Risk Reduction and Management Offices aron masiguro ang koordinado ug komprehensibong seguridad sa CVIRAA Meet.
Sumala kang PRO7 Regional Director PBGen Redrico A. Maranan, nakapokus ang tanang pwersa sa seguridad sa pagpanalipod sa mga atleta ug partisipante aron malinawon ug malampuson ang regional sports event.
Giawhag usab sa PRO7 ang publiko nga mokooperar sa mga awtoridad ug mosuporta sa CVIRAA Meet isip usa sa pinakadako nga kalihokan sa mga estudyante-atleta sa Central Visayas.
