CEBU CITY –Mukabat dul-an usa ka milyon nga kantidad sa shabu ang nasakmit sa mag-inahan sa Sitio Lawis, Barangay Lorega San Miguel, dakbayan sa Sugbo.
Kini subay na usab sa gipahigayun nga buybust operation sa Cebu Drug Enforcment Unit (CDEU) sa Cebu City Police Office (CCPO) nga gipanguluhan ni Police Supt. Christopher Navida.
Giila ang mga suspek nga si Loreta Calledo Devibar, 42 anyos ug ang anak niini nga Phoebe Velo Oblianda, 30 anyos, buntis ug pareho nga nanimuyo sa nahisgutang dapit.
Nakuha sa mga suspek ang usa ka large plastic size sa gituohan nga shabu, siyam ka medium size pack diin adunay gibug-atun nga 70 ka gramos nga mubalor ug 826,000 ka pesos.
Samtang sa habig sa usa sa suspek, gilimod niini nga ila ang maong mga iligal nga drogas sanglit gibilin raman kini sa ilang balay.
Gi-angkon usab niini nga nahadlok siya ug kahibalo kini nga iligal ang ilang gibuhat apan gibuhat gihapon sa mga suspek isip dugang income na usab sa ilang pamilya.
Sa pagkakaron, nagtingkagol na sa prisohan ang mga suspek ug gikatakda nga pasakahan ug kaso nga adunay kalambigitan sa iligal nga drogas.
