CEBU CITY- Gipadakop sa iyang kaugalingong inahan ang usa ka 35-anyos nga lalaki kinsa gituohang ubos sa impluwensya sa ginadiling drugas human kini nagduwa sa iyang kinatawo sa iyang atubangan sa panimalay niini sa Sitio Lawis, Alaska, Barangay Mambaling ning dakbayan sa Sugbo Martes, Pebrero 11, 2025.
Giila lang ang dinakpan sa alyas nga “Alex”, 35-anyos ug ang inahan niini nga gitago sa pangalang “Maria”, 64-anyos nga pulos lumulupyo sa samang dapit.
Subay sa imbestigasyon nga gilusad sa Mambaling Police Station sa Cebu City Police nga giingong naghigda na sa katre ang 64-anyos nga inahan diin nikalit lang og layat ang dinakpan aron mutupad og didto na niya gipagawas ug giduwaan iyang kinatawo atubangan sa iyang inahan.
Tungod sa kakugang sa panghitabo, mibiya ang inahan sa katre og mitawag dayon sa pulis tungod sa nilihokan sa iyang anak nga gidudahang impluwensiyado sa ginadiling drugas.
Kasamtangang anaa na sa kustodya sa Mambaling Police ang dinakpan diin mag atubang kini sa kasong “unjust vexation” tungod sa panghitabo.
Sa dihang gihinabi, iyahang gi-angkon nga maggamitan kini og ‘shabu’ apan gihimakak niini nga nagbinastos siya sa ilang panimalay niadtong higayona.
