CEBU CITY-Nagkinahanglan pa ug dugang pagpaningkamot ang administrasyong Duterte arun nga makab-ot ang mga nakahan-ay niini nga plano alang sa katawhang Pilipino.
Kini ang reaksyon ni Lapu-Lapu City lone district Congresswoman Paz Radaza, sa nahitabo nga State of the Nation Address (SONA) ni Presidente Rodrigo Duterte kagahapong adlawa.
Matud ni Radaza nga daghan pa ang angayan nga buhaton ang administrasyon alang sa kaayohan sa kinabag-ang Pilipino, bisan pa man sa taliwa sa daghang babag sama na lang sa COVID-19 pandemic.
Gidugang pa sa kongresista nga ang mga babag sa pandemya ang himuon nga ‘stepping stone’ sa presidente arun nga mas mumaayo pa ang serbisyo alang sa katawhan.
‘Commitment’
Sa habig ni Mandaue City 6th District Congresswoman Emmarie ‘Lolypop’ Ouano-Dizon,nagkanayon kini nga taliwa sa mga hagit sa COVID-19 nga gi-atubang karun sa Pilipinas, giingong nagpakita sa gihapon si Presidente Duterte sa iyahang “commitment” sa mga Pilipino nga mabuhat niini ang iyahang mga saad ug uban pang mga nakahan-ay nga programa sama na lang edukasyon, panglawas, economic assistance ug uban pa.
Nanghinaut lang si Dizon nga tinud-on sa presidente ang paggukod niini sa mga telecommunications company nga adunay bati nga serbisyo arun nga matarung ug mapaspasan na ang internet connection sa nasud ilabi na karun nga gikinahanglan kini alang sa “new normal”. | SBR
