METRO MANILA-Gitataw ni kanhi Senador Leila De Lima nga si kanhi Presidente Rodrigo Duterte maoy utok sa giingong extrajudicial killings (EJK) sa iyang kampanya batok sa ilegal nga drugas.
Sa hearing sa House Committee on Human Rights, si De Lima niingon nga way duda nga si kanhi Presidente Duterte maoy utok tungod kay siya ang tigpasiugda sa drug war killings.
Si De Lima napriso sulod sa unom ka tuig human gipasakaan og kaso sa ilegal nga drugas.
Naabsuwelto siya sa tulo ka kaso nga gipasaka batok kaniya.
Matod sa kanhi senador, ang drug war usa ka opisyal nga programa sa gobyernong Duterte nga gipatuman pinaagi sa Oplan Double Barrel, usa ka dokumentado nga plano sa Philippine National Police (PNP).
Dugang pa sa kanhi senador, ang mga lakang nga gihimo aron mapatuman kining maong plano usa ka sistematikong pag-atake sa mga sibilyan ug kinahanglang isipon nga mga krimen batok sa katawhan ubos sa internasyonal nga makatawhanong balaod.
Si De Lima niingon nga ang drug war unang gipatuman ni Duterte niadtong mayor pa siya sa Davao City gamit ang Davao Death Squad (DDS).
Matod ni De Lima, gi-organisa ang mga assassination squad nga gilangkuban sa mga pulis ug sibilyan aron ipahigayon ang pagpatay.
Giingong kining grupoha ang nagdefine kon unsay ilang patyon gamit ang operasyon sa kapulisan o mga “riding-in-tandem” vigilantes.
Base sa report sa Malacañang niadtong 2017, si De Lima niingon nga kapin sa 20,000 ka namatay ang naila sulod sa 16 ka bulan.
Apan giingong 52 lang ka kaso ang gi-amendahan sa Department of Justice, diin 32 niini ang gikonsiderar nga sirado, usa ang nakonbikto, ug ang uban gipaubos pa sa imbestigasyon.
Si De Lima niinsistir sa importansya sa nagpadayong imbestigasyon sa ICC aron manubag ang mga dagkong opisyal.
