Gikumpirmar sa International Criminal Court (ICC) Pre-Trial Chamber I ang tanang mga kaso nga gisang-at batok kang kanhi Presidente Rodrigo Roa Duterte, kalabot sa giingong mga krimen batok sa katawhan nga gihimo ubos sa kampanya batok sa droga.
Sumala sa ICC, ang ebidensya nga gipresentar sa Office of the Prosecutor igo na aron ipadayon ang pagdungog, diin lakip sa mga kaso nga gikumpirma mao ang tulo ka ihap sa mga krimen batok sa katawhan, nga nagtumong sa 78 ka biktima sa extrajudicial killings sa Pilipinas.
Human sa desisyon, ang trial ni Duterte pormal na nga nagpadayon sa The Hague, Netherlands. Kini nga lakang nagsunod sa naunang desisyon sa Appeals Chamber nga nagpamatuod sa hurisdiksyon sa ICC sa mga krimen nga nahimo sa wala pa ang Pilipinas miatras gikan sa Rome Statute niadtong 2019.
Sumala sa mga analista, kini nga desisyon nagtimaan sa usa ka makasaysayanong milestone sa internasyonal nga hustisya, tungod kay kini ang unang higayon nga ang usa ka kanhing pangulo sa estado gikan sa Southeast Asia moatubang niining lebel sa husay.
