Nisang-at og petisyon ang Duterte Youth Partylist sa Korte Suprema aron kuwestiyonon ang desisyon nga giluwatan sa Commission on Elections (COMELEC) gahapong adlawa, Setyembre 3, 2025.
Nagtuo ang party-list nga ang COMELEC giingong nakalapas sa Konstitusyon samtang nag-angkon usab og ‘grave abuse of discretion’ dihang gikanselar ang ilang ‘registration’.
Busa, ilang gihangyo ang Korte Suprema nga moluwat og Temporary Restraining Order o TRO, Status Quo Ante Order, ug uban pa aron masulbad dayon ang isyu.
Matud pa sa Chairperson sa Duterte Youth Partylist nga si Ronal Cardema nga walay basehanan ug walay lig-ong ebidensiya ang mga alegasyon nga gipasaka batok kanila.
Sa maong petisyon, hugot ang pagtuo sa Duterte Youth Partylist nga paminawon sila sa Korte Suprema ug ihatag ang ilang mga hangyo.
