Nanawagan sa publiko si Dr. Jessica Maribojoc, ang pangulo sa Cebu City Department of Veterinary Medicine and Fisheries (DVMF), nga hunahunaon pag-ayo ang pinansyal, emosyonal, ug pisikal nga mga responsibilidad sa pagpanag-iya og binuhing kahayopan sa dili pa mosagop o mag-atiman og binuhi.
Sumala ni Maribojoc, ang mga indibidwal nga dili andam, mamahimong iresponsableng tag-iya nga mobiya ug mo-abanduna sa mga binuhi.
Dugang niya nga ang mga laag nga hayop nga nagpabiling unspayed, ug makatampo sa nagkadaghang populasyon sa mga stray animals sa siyudad sa Sugbo.
Samtang sa pikas bahin, nakatala usab ang DVMF og unang kaso sa human rabies case karong tuiga.
Gipahibalo usab kini ni Maribojoc, diin matod niya, ang pasyente usa ka senior citizen, kinsa napaakan niadtong Oktobre 2025, apan wala motaho kabahin sa maong insidente, ug wala usab mopaubos sa saktong anti-rabies vaccination, hinungdan nga namatay kini niadtong buwan sa Perbrero ning tuiga.
Ang datos sa DVMF nagpakita nga ang Dakbayan sa Sugbo nakatala og 32 ka animal rabies cases sa tuig 2024, ang pinakataas nga natala sa siyudad hangtod karon.
Sa tuig 2025, adunay 31 ka animal rabies cases ug usa ka kumpirmadong human rabies case.
Sa unang katunga sa tuig 2026, ang mga awtoridad nakatala na og 15 ka kaso sa animal rabies cases.
