CEBU CITY-Nakapabakuna na sa 43,043 ka mga iro ang naturokan sa buhatan sa Department of Veterinary Medicine and Fisheries (DVMF) sa kagamhanang dakbayan sa Sugbo.
Kini atol sa datos niini gikan sa buwan sa Enero hangtud sa Hulyo sa kasamtangang tuig nga gibutyag ni Dr. Alice Utlang, ang pangu ug ang City Veterinarian sa DVMF.
Matod ni Dr Utlang nga ang maong gidaghanon ang sa house-to-house nga pagpamakuna lang kini ug wala pay labot ang ilang mga nabakunahaan sa pinaagi sa ilang “Catch-Neuter-Vaccinate- Return (CNVR) nga programa.
Dugang pa nga sa pagkakaron, mas gihingusgan sa buhatan ang CNVR Program alang sa mga saag, libod-suroy ug mga iro sa kadalanan.
Ang madakpan nga mga iro sa dalan dad-on sa iyang mga sakop sa ilang buhatan, bakunahan, butangan og ilhanan (aron sa sunod nilang makit-an sa dalan kahibawo na sila nga bakunado na nga iro), dayon ibalik sa hain kini makit-i.
Gawas sa CNVR Program, aduna sab gipahigayon nga Iro Day kada adlaw nga Huwebes ug Iring Day kada adlaw nga Biyernes ang buhatan sa DVMF diin kanus-a mangkapon sila ug mang-ligate sa bayranan nga P625 ngadto sa P650 lang.
Gipadayag sab ni Dr. Utlang nga nindot gyud ang CNVR tungod kay dili tanan nanag-iya og mga iro adunay higayon nga makapabakuna ug neuter sa ilang mga iro.
