CEBU – Namatay sa aksidente sa sakyanan ang usa ka 61-anyos nga e-bike driver ug 68-anyos nga angkas niini, nga naglambigit sa aksidente sa duha ka mga van sa M.J Cuenco Avenue, Corner T. Padilla Street sa Barangay T Padilla, dakbayan sa Sugbo, gahapong adlawa Lunes, Agosto 1, 2022.//
Giila ni Police Staff Sergeant Nemesio Denopol, ang imbistigador sa Parian Police Station, ang biktima nga si Generoso Paca, 61, ang drayber sa e-bike, residente sa Barangay Ermita Proper, dakbayan sa Sugbo, nga gidala pa sa ospital si Paca apan gideklarar nga dead on arrival sa attending physician.//
Samtang ang laing naangol sa aksidente mao ang pasahero sa e-bike nga si Felipa Maurin, 68, residente sa Barangay T. Padilla, dakbayan sa Sugbo, nga una na siyang gideklarar nga nasamdan sa aksidente, apan, pasado alas 3 sa hapon sa samang adlaw, nakadawat og impormasyon ang kapulisan nga namatay usab siya sa usa ka tambalanan sa dakbayan sa Sugbo.//
Gipaabot nga mopasaka og reklamong reckless imprudence resulting in homicide, physical injuries, and multiple damage to property ang kapolisan batok kang Alberto Anadon, 47, kinsa nagmaneho sa van nga narehistro sa pangalan sa Philippine Health Insurance Corporation.//
Kasamtangang gitanggong si Anadon sa detention facility sa Parian Police Station samtang nagpaabot sa pagpasaka sa tukmang kaso batok kaniya.///
